[២៩៧] អាត្មា​អញ​បាន​ចេញ​ទៅ អំពី​ទី​សម្រាក ក្នុង​វេលាថ្ងៃ លើ​ភ្នំ​ឈ្មោះ គិជ្ឈកូដ ហើយបាន​ឃើញដំរី​ដែល​ចុះឡើង ក្បែរឆ្នេរ​ស្ទឹង (ឈ្មោះ​ចន្ទភាគា)។ បុរស​កាន់​កង្វេរ បង្គាប់​ថា ឯងចូរជូនជើងមក ដំរីក៏ជូនជើង ហើយបុរសក៏ឡើងជិះដំរី។ អាត្មា​អញ​បាន​ឃើញដំរី ដែល​គេ​មិន​ទាន់​ទូន្មាន គេ​អាចទូន្មាន ឲ្យ​លុះ​ក្នុង​អំណាច​របស់​ពួក​មនុស្សបាន ហើយក៏ទៅ​កាន់​ព្រៃ តាមកិរិយា​របស់​ដំរីនោះ ក៏​បាន​ធ្វើ​ចិត្ត​ឲ្យ​នឹងធឹង ព្រោះ​ឃើញ​ដំរីនោះ។