[៣០០] ការ​រលាស់​ខ្លួន​ចេញ (ចាក​ភព) ក្នុង​លោក របស់​នាង មិន​មាន​ទេ នាង​នឹង​ធ្វើ​អ្វី​ដោយ​វិវេក នាងចូរបរិភោគនូវ​តម្រេក​ដែល​អាស្រ័យនូវ​កាម​ទាំង​ឡាយ កុំឲ្យ​ក្ដៅ​ក្រហាយ ក្នុង​កាលជា​ខាងក្រោយឡើយ។

កាម​ទាំង​ឡាយ​មាន​ឧបមា​ដោយ​លំពែង និងដែក​សូល ជា​គ្រឿង​កាប់​ចិញ្រ្ចាំនូវ​ឧបាទានក្ខន្ធ​ទាំង​ឡាយ អ្នក​ឯង​ពោល (សំដៅ) តម្រេក​ក្នុង​កាមណា ឥឡូវ​នេះ តម្រេក​ក្នុង​កាមនោះ ជា​ទី​អផ្សុក​ដល់​អាត្មា​ទេ​តើ។ សេចក្ដីរីករាយ​ក្នុង​អារម្មណ៍​ទាំង​ពួង យើងបាន​កំចាត់​ចេញ​ហើយ គំនរងងឹត យើងបាន​ទំលុះ​ទំលាយ​ហើយ ម្នាលមារមាន​ចិត្តបាប អ្នក​ឯង​ចូរដឹងយ៉ាង​នេះ​ចុះ ម្នាល​មារថោកទាប អ្នក​ឯងយើងកំចាត់​ចេញ​បាន​ហើយ។