[១៦៤] ម្នាលភិក្ខុទាំងឡាយ ភិក្ខុចូលទៅអាស្រ័យ​ស្រុកណាក្តី និគមណាក្តី ហើយនៅក្នុងសីមា​ដែលសង្ឃ​មិនបានសន្មត មិនបានតាំង​ទុកហើយ សីមាណា​ដែលជាគាមសីមា របស់​ស្រុកនោះក្តី សីមា​ណាដែលជានិគម​សីមារបស់​និគមនោះក្តី សីមានេះហៅថា មានសំវាសស្មើគ្នា មានឧបោសថ​ជាមួយគ្នា ក្នុងស្រុក ឬក្នុងនិគមនោះ។ ម្នាលភិក្ខុទាំងឡាយ បើក្នុងព្រៃ មិនមែនស្រុក សីមាដែលកំណត់​៧អព្ភន្តរៈ​¹⁾ ដោយជុំវិញ សីមានេះហៅថា មានសំវាសស្មើគ្នា មានឧបោសថ​ជាមួយគ្នា ក្នុងព្រៃនោះ។ ម្នាលភិក្ខុទាំងឡាយ ស្ទឹង​²⁾ ទាំងអស់មិនមែនជាសីមា សមុទ្ទទាំងអស់​មិនមែនជាសីមា ជាតស្រះ​³⁾ ទាំងអស់​មិនមែនជាសីមា។ ម្នាល​ភិក្ខុ​ទាំងឡាយ ទីណាដែលបុគ្គល​កំណត់ ដោយសាចទឹក​របស់មជ្ឈិមបុរស ដោយជុំវិញ​ក្នុងស្ទឹងក្តី ក្នុងសមុទ្ទក្តី ក្នុងជាតស្រះក្តី ទីនេះហៅថា មានសំវាសស្មើគ្នា មានឧបោសថ​ជាមួយគ្នា ក្នុងទីមាន​ស្ទឹង​ជាដើមនោះ។

[១៦៥] ក៏សម័យនោះឯង ពួកឆព្វគ្គិយភិក្ខុទំលាយ​⁴⁾ សីមាដោយសីមា។ ភិក្ខុទាំងឡាយក្រាបទូលដំណើរនុ៎ះ​ចំពោះព្រះដ៏មានព្រះភាគ។ ព្រះអង្គទ្រង់មាន​បន្ទូលថា ម្នាលភិក្ខុទាំងឡាយ សីមាដែលភិក្ខុទាំងឡាយណាសន្មត​មុនហើយ កម្មនោះរបស់ភិក្ខុទាំង​ឡាយ​នោះ ប្រកបដោយ​ធម៌មិនកម្រើក គួរតាំងនៅបាន ម្នាលភិក្ខុទាំងឡាយ សីមាដែលភិក្ខុ​ទាំងឡាយ​ណាសន្មត​ជាខាងក្រោយ កម្មនោះ​របស់ភិក្ខុទាំងឡាយនោះ មិនប្រកបដោយធម៌ ជាកម្មកម្រើក មិនគួរ​តាំងនៅបាន ម្នាលភិក្ខុទាំងឡាយ ភិក្ខុមិនត្រូវ​ទំលាយសីមា​⁵⁾ ដោយសីមាទេ ភិក្ខុណាទំលាយ ត្រូវ​អាបត្តិទុក្កដ។ ក៏សម័យនោះឯង ឆព្វគ្គិយភិក្ខុទាំងឡាយគ្របសង្កត់សីមាដោយសីមា។ ភិក្ខុ​ទាំងឡាយ​ក្រាបទូលដំណើរនុ៎ះ​ចំពោះព្រះដ៏មានព្រះភាគ។ ព្រះអង្គទ្រង់មាន​បន្ទូលថា ម្នាលភិក្ខុទាំងឡាយ សីមា​ដែល​ភិក្ខុទាំងឡាយណាសន្មត​មុនហើយ កម្មនោះរបស់ភិក្ខុទាំង​ឡាយ​នោះ ប្រកបដោយ​ធម៌ ជាកម្ម​មិន​កម្រើក គួរតាំងនៅបាន ម្នាលភិក្ខុទាំងឡាយ សីមាដែលភិក្ខុ​ទាំងឡាយ​ណាសន្មត​ជាខាងក្រោយ កម្ម​នោះ​របស់ភិក្ខុទាំងឡាយនោះ មិនប្រកបដោយធម៌ ជាកម្មកម្រើក មិនគួរ​តាំងនៅបាន ម្នាលភិក្ខុ​ទាំង​ឡាយ ភិក្ខុមិនត្រូវ​គ្របសង្កត់សីមា⁶⁾ ដោយសីមាទេ ភិក្ខុណាគ្របសង្កត់ ត្រូវអាបត្តិទុក្កដ។ ម្នាលភិក្ខុទាំងឡាយ តថាគតអនុញ្ញាត​ឲ្យ​ភិក្ខុ​សន្មតសីមា ឲ្យដម្កល់ទុកនូវសីមន្តរិក​⁷⁾ ហើយសឹមសន្មតសីមា។